बर्दघाट, नवलपरासी (पश्चिम) । सुस्ता क्षेत्रका बासिन्दाको नागरिकता वितरण प्रक्रियालाई अघि बढाउने उद्देश्यले संकलन गरिएको विवरण प्रमुख जिल्ला अधिकारीलाई हस्तान्तरण गरिएको छ।
सुस्ता गाउँपालिकाको पहलमा नागरिकता सम्बन्धी विवरण संकलन गरी जिल्ला प्रशासन कार्यालय नवलपरासी (बर्दघाट सुस्ता पश्चिम) का प्रमुख जिल्ला अधिकारीलाई बुझाइएको हो। उक्त विवरणका आधारमा नागरिकता वितरण प्रक्रिया अगाडि बढाउने अपेक्षा गरिएको स्थानीयवासीले बताएका छन्।
सुस्ता क्षेत्रका धेरै नागरिक लामो समयदेखि नागरिकताविहीन रहँदै आएका छन्। नागरिकता नहुँदा शिक्षा, स्वास्थ्य, रोजगारी, बैंकिङ सेवा तथा राज्यबाट प्रदान गरिने विभिन्न सेवासुविधा प्राप्त गर्न कठिनाइ भइरहेको उनीहरूको गुनासो छ।
स्थानीय जनप्रतिनिधिहरूले सुस्ताका वास्तविक बासिन्दालाई शीघ्र नागरिकता उपलब्ध गराउन सरकारसँग माग गरेका छन्। नागरिकता समस्या समाधानका लागि सम्बन्धित निकायबीच आवश्यक समन्वय गरी प्रक्रिया छिटो टुंग्याउनुपर्नेमा जोड दिइएको छ।
सुस्ताका बासिन्दाको नागरिकता समस्या वर्षौंदेखिको जटिल विषय भएकाले यसलाई संवेदनशील रूपमा समाधान गर्नुपर्ने स्थानीय सरोकारवालाको भनाइ छ। उनीहरूले संकलित विवरणका आधारमा योग्य नागरिकलाई यथाशीघ्र नागरिकता उपलब्ध गराउन सरकारसँग आग्रह गरेका छन्।
