नेपालमा पछिल्लो समय चिनियाँ नागरिकको लगानीमा कल सेन्टर खुल्ने क्रम बढ्दो छ । ती कल सेन्टरबाट साइबर र आर्थिक अपराध भइरहेको प्रहरी बताउँछ, तर अत्याधुनिक प्रविधिमा काम गर्ने चिनियाँको अपराध पुष्टि गर्न प्रहरीलाई हम्मेहम्मे पर्छ ।

काठमाडौं । नेपाल प्रहरीले सोमबार काठमाडौंको तीनकुनेस्थित गैरिगाउँमा चिनियाँ लगानीमा सञ्चालित कल सेन्टरमा छापा मारेर ३६ जनालाई पक्राउ गर्‍यो । व्यवसायी सुरज वैद्यको घर भाडामा लिएर उनीहरुले ‘स्काई वर्ल्ड सर्भिस सेन्टर’ कम्पनीको आवरणमा अवैध कल सेन्टर चलाइरहेका थिए ।

Advertisement

जिल्ला प्रहरी परिसर काठमाडौंका प्रमुख भरत बोहोराका अनुसार पक्राउ पर्नेमा कम्पनीका व्यवस्थापकीय प्रमुख ४३ वर्षीय चिनियाँ नागरिक हु एन्ह्वा, भारतीय नागरिक मनोज शैनी, नेहा गुप्तालगायत छन् । उनका अनुसार छापा मारिएको स्थानबाट ८ लाख २९ हजार रुपैयाँ, २६२ ल्यापटप र ७४८ डेस्कटप कम्प्युटर बरामद भएको छ ।

‘अनलाइनमार्फत डिजिटल वालेट चलाएर उनीहरुले भारतलगायत विभिन्न मुलुकका व्यक्तिहरुलाई ऋण प्रवाह गरेको सूचना छ’ बोहोराले अनलाइनखबरसँग भने, ‘जस्तै उनीहरुले २० हजार रुपैयाँ ऋण दिने भए भने ब्याजवापतको ५ हजार सुरुवातमै कटाएर १५ हजार रुपैयाँ मात्रै दिने रहेछन् ।’ यसरी दिइएको रकम तोकिएको समयमा फिर्ता नगरे फोन गरेर धम्की र ब्ल्याकमेलिङ सुरु हुने गरेको बोहोरा बताउँछन् ।

ऋणका लागि एप्लिकेसनमा लगइन गर्दै व्यक्तिगत गोपनीयता रहनुपर्ने आधार कार्ड, रासन कार्ड लगायतका विवरण पनि लैजाने हुँदा त्यही आडमा पछि धम्क्याउने गरेको बोहोराको दाबी छ । तर, चिनियाँको यी गतिविधिलाई पुष्टि गर्ने बलियो आधार प्रहरीसँग छैन ।

काठमाडौं, पोखरा, बुटवल र चितवनमा अझै ठूलो संख्यामा बसेका चिनियाँ नागरिक अपराधमा संलग्न भएको सूचना प्रहरीसँग छ । तर हतारको अपरेशन र प्रविधिक ज्ञानको अभावमा हुने फितलो अनुसन्धानले पक्राउ परेका चिनियाँ नागरिक अधिकांश घटनामा उन्मुक्ति पाउँदै आएका छन् ।

उनीहरुले कुन–कुन एप्लिकेसन चलाउँदै आएका थिए र यसबाट को–को पीडित भए भन्ने पनि स्पष्ट छैन । उनीहरुले कति बराबरको आर्थिक कारोबार गरे भन्ने पनि प्रहरीसँग जानकारी छैन । यसबाट पीडित को–को हुन् भन्ने पनि प्रहरीले हालसम्म पत्तो लगाएको छैन ।

एसएसपी बोहोरा प्रश्न गर्छन्, ‘झण्डै एक हजार मानिस र कम्प्युटर राखेर उनीहरु के गरिरहेका थिए त ?’ अनुसन्धान अधिकृतहरुका अनुसार पनि उनीहरुले नेपालमा बसेर अवैध गतिविधि गरेकोमा दुईमत छैन ।

समस्या चाहिँ हालसम्म उनीहरुले गरेको अवैध कामलाई पुष्ट्याइँ गर्ने आधार प्रहरीले भेटाउन सकेको छैन । यसअघि चलाइएका अपरेशनमा पनि यही समस्या देखिने गरेको थियो । मंगलबार प्रहरीको डिजिटल फरेन्सिक प्रयोगशालामा पठाएर कम्युटर र ल्यापटपको विवरण केलाउने प्रहरीको तयारी छ । एक अनुसन्धान अधिकृत भन्छन्, ‘कम्प्युटर र ल्यापटपको जाँचबाट महत्वपूर्ण सबुत प्राप्त हुने अपेक्षा छ ।’

हाल उनीहरुलाई के अभियोगमा म्याद थप गर्ने भन्नेमा प्रहरी अलमलमै छ । बोहोरा भन्छन्, ‘भोलिसम्ममा कुनै टुंगो लाग्ला ।’ विगतमा यस किसिमको कसूरमा प्रहरीले अभद्र व्यवहारको कसूर वा बैंक तथा वित्तीय संस्था ऐन अनुसार मुद्दा चलाउने गरेको थियो ।

बिज्ञापन
green_resturant_ad